胡鴻鈞、吳業坤、胡諾言同關楚耀呢日齊齊為一個愛心音樂會擔任表演嘉賓，近排成日見坤哥同Hubert孖住出現，連聖誕新年假期都唔例外，問坤哥擔唔擔心坤嫂詐型，估唔到坤哥竟然話平時同太太相處嘅時間已經太多，叫Huber救下佢，Hubert仲好抵死話，唔怪得一有job可以做，坤哥就即刻撲出嚟啦！
胡仔啱啱同小朋友去完旅行，一家人去咗滑雪玩得好開心，Kelvin羨慕之餘都有啲心郁郁想做爸爸，仲趁機請教胡仔造人秘訣，胡仔就建議要「多運動」，講緊嘅係真正嘅運動，大家唔好諗多咗。
見胡仔同Kelvin咁啱key，原來佢哋曾經合作劇集《特技人》，仲要飾演一對好兄弟，Kelvin話雖然大家少見面，但默契依舊，二人仲密謀組成新組合「胡混過關」，聽個名都真係幾有創意。
