新手父母都有一個共同嘅愛好，就係無時無刻都想將自己可愛嘅BB同大家分享。去年榮升爸爸嘅方力申，自從愛女Isla出世後，不時就會同大家分享囡囡嘅照片，繼早前分享咗以聖誕作主題嘅BB相後，方力申呢日再分享咗另一輯主題嘅BB相。
相中Isla着上泳衣戴上泳帽同泳鏡，而身邊就擺放住奧運火炬、世錦賽金牌等物品；而另一輯相Isla就化身小小畫家，戴上紅色畫家帽，手握羊毛氈製作而成嘅畫筆，後方則擺有小方嘅畫像。
方力申喺帖文中為大家解構呢兩輯相嘅主題：「之前講嘅兩個造型真係有人估中晒，就係Isla媽媽嘅嗜好畫畫，同埋我最擅長嘅游水。兩張相最特別嘅地方就係畫家旁邊條蛇真係阿媽畫嘅；而港隊代表旁邊嗰啲物件都係佢爸爸嘅，有奧運火炬、世錦賽金牌、同埋佢當年參加悉尼奧運嘅選手證添。 」而方力申太太葉萱，則分享自己與囡囡Isla對望嘅照片，並以韓文寫道：「新的一年，新的目的，新身份，新歡。」
另外，杜德偉早前亦有去探望Isla，佢仲送咗一頂綉咗「NEW DAD」嘅棒球帽畀新手爸爸方力申。
陳偉霆與女友何穗亦於2025年榮升爸爸媽媽，何穗於2號就分享咗三張佢哋同BB嘅照片，其中一張BB瞓喺赤膊嘅陳偉霆後背上，而另一張則係何穗手握BB嘅雙腳，最後一張係兩人輕按於BB手上。
何穗以英文於帖文中寫道：「隨着2025年完結，它以最美好的方式改變了我的世界。與你共度的每一天，都像是從未預料到的珍貴禮物。感謝你以我無法想像的方式填滿我的心。願未來所有的新年都有你相伴。❤️祝願大家擁有溫暖美好的2026年。願我們都能珍惜與摯愛共度的每個時刻。💗💗💗」
