TVB盛事《萬千星輝頒獎典禮2025》圓滿結束，台慶劇《新聞女王2》橫掃九大獎項，當中 黃宗澤Bosco 與 佘詩曼 憑此劇同封香港及大灣區視帝視后，阿佘更係破紀錄四度封后。
王敏奕同樣憑《新聞女王2》劉艷一角奪得「最佳女配角」，同劇嘅龔慈恩及佘詩曼都與其擁抱。Venus上台於頒獎嘉賓 夏文汐 及 張兆輝 手上領獎時，直言腦袋一遍空白，又同去年獲最佳衣著獎一樣，不忘多謝老爺曾志偉。
而憑Ivan BB一角奪得「最佳男配角」嘅何廣沛，得知獲獎時即爆喊，而當佢到台上領獎時，頒獎嘉賓 羅家英 即興整蠱，要佢先講得獎感言後攞獎，搞到廣沛即時扁嘴。
四度斬獲視后嘅佘詩曼，雖然踏上過頒發台無數次，不過當佢於 林文龍 及 郭可盈 手上領取「最佳女主角」獎座時，都笑言自己腦海一遍空白，完全諗唔起感謝詞。
憑「賤精」Kingston一角首奪視帝嘅Bosco，宣佈獲獎時亦淚崩人前，佢笑言以為自己奪得「大灣區最喜愛TVB男主角」後，就再無機會上台攞獎，喺台上Bosco多謝主席許濤，喺呢個艱難嘅環境下，都肯畀咁多心機、時間同金錢去支持劇集嘅製作。
