鍾鎮濤 日前先宣佈同太太 范姜素貞 投資抗衰老醫學中心做老闆，而一踏入2026年，佢就於新加坡繼續為自己嘅巡迴演唱會演出。今次佢繼續帶同寶貝女鍾懿同鍾幗一齊夾Band表演。此行鍾懿唔止擔任表演嘉賓，更臨時充當和音。
B哥哥剛過去周末喺新加坡演出，不過開騷前一晚突然收到演唱會總監消息，指其中一位馬來西亞女和音身體不適，要馬上就醫未能參與演出，鍾懿得知消息後，就自薦為演唱會充當和音喇。
身為北京電影學院導演系研究生嘅佢，除咗同爸爸以及妹妺合唱多首歌曲外，又自己獨唱《記得》同《小鎮姑娘》兩首歌曲，加上又為擔任和音，難怪被笑稱係「全能囡囡」喇。
鍾懿話：「綵排時知道咗和音姐姐唔舒服，爹哋綵排嘅時候，我就問一個工作人員攞咗枝咪，然後我就唱和音。首歌完咗我就同爹哋講，其實我可以幫手和音，佢起初仲話唔使，點知大家發現原來頭先和音係我唱，爹哋仲以為係program(預先錄好)，之後知道其實係我都贊成同覺得我做到。」
既做表演嘉賓又要和音，鍾懿就未覺分身不暇：「其實爹哋啲歌我由細聽到大都好熟，所以幫佢啲歌做和音，一啲都唔難。」
完show後總監特別到後台稱讚Blythe ，讚佢唔止唱歌好，臨時上陣做和音亦非常稱職，Polly仲叫Blythe問爹哋攞支票收人工。