TVB《萬千星輝頒獎典禮2025》今日（4號）於澳門隆重舉行，林盛斌（Bob）奪得「最佳男主持」獎項，Bob坦言感謝父母同細佬支持佢加入演藝行業、又感激老婆黃乙頤（Pearl）作為最強大後盾，回想有幾年與獎座擦身而過，今年終於獲獎，Bob希望令啲仔女覺得驕傲，由於Bob得獎感言太激動，竟然將獎座整爛咗，令全場嚇呆，隨即笑聲不斷。
好友陳庭欣及胡定欣喺社交平台恭喜Bob之餘，仲笑佢敲爛獎，定欣答應打邊爐慶祝：「恭喜Bob爺，你絕對係最佳主持，打個邊爐『爆檳』🍾，唔好爆獎啦！」有金牌媒人之稱嘅Bob，今年喺台上公開承諾為陳庭欣牽紅線搵Mr. Right，陳庭欣亦笑Bob係咁多年嚟第一個整爛獎座，真係實至名歸，『撼』贏所有對手。」
Bob仔女收睇電視時，得知爸爸獲獎即開心拍手兼尖叫，大女林霏兒（Faye）及兒子林道申（Jaye）更喜極而泣，當畫面見到爸爸整爛咗獎，立即開懷大笑，跟住大女Faye喺IG貼出童年照並寫道：「我阿爸係最佳男主持，贏咗全港100%。你成日都問我點解想做呢一行，但係…其實係因為你，今晚你又得咗，我好驕傲可以係你個女。」
