《萬千星輝頒獎典禮2025》星期日晚於澳門上葡京綜合度假村舉行，呢晚分別頒發多個獎項，表揚去年於劇集同節目表現優秀嘅同事，一眾藝人盛裝打扮於參與頒獎前踏上紅地氈。而多個獎項都成為台慶劇《新聞女王2》嘅囊中物，包括香港同大灣區視帝、視后、最佳劇集、大灣區我最喜愛TVB劇集、男、女配角及最佳電視歌曲，可以話橫掃今年頒獎禮呀。
阿佘再以「Man姐」文慧心一角封后，亦係歷來第四度成為視后，帶淚上台領獎嘅佢，事後仲指有如發夢一樣，仲非常多謝影迷與投票嘅朋友。佢話首度拍攝續集，Man姐一角有如上身一樣呀。
首度榮膺視帝嘅 黃宗澤 ，由好拍檔兼前輩苗僑偉手上接過獎項，感觸落淚嘅佢，以賤嘴「Kingston」一角成功殺退強敵，仲以為先獲大灣區視帝後，已無緣爭奪香港寶座，不過一見到嘉賓三哥出現舞台就有預感有機會咁話。
何廣沛 呢位Man姐身邊嘅「床寶」亦獲最佳男配角嘉許，佢公開感謝未婚妻之餘，亦非常多謝Man姐嘅支持呀。「劉艷」 王敏奕 亦成為最佳女配角，唔止台上感動落淚，於台下受訪時，有老公現場打氣嘅Venus一樣非常感觸。
有感動呢晚亦有爆笑場面，成為最佳男主持嘅 林盛斌 於台上太肉緊連獎座都拆爆一分為二，雖然手上整爛嘅只係道具，不過佢就自稱樣衰，仲直指自己係型到盡頭呀。最佳女主持就由 車婉婉 獲得，喊包表現不出所料。同樣爆喊嘅仲有飛躍進步男藝人 吳業坤 ，坤哥仲以日文向太太表愛意呀。飛躍進步女藝人就由 葉蒨文 收歸所有，Sophie就指可惜未能同男友曾展望一齊得獎喇。
「雙洋」 劉洋 同 馮皓揚 同時獲得最佳男新人獎，劉洋現場聽到宣佈自己名時仲以為係聽錯，天然呆表情非常搞笑。而最佳女新人就頒予 倪嘉雯 ，佢仲非常多謝一眾訓練班同學嘅支持。
最佳衣著由現場傳媒投票選出，而傳出緋聞後一直避免同台嘅 朱敏瀚 同 陳曉華 ，就因為齊齊得獎，最後終於同台合照受訪喇。
