TVB行政主席 許濤JP 喺《萬千星輝頒獎典禮2025》宣布，向曾志偉頒發「萬千光輝榮譽傳奇」大獎。喺全場人士站立嘅掌聲致敬下，獎門人上台接受殊榮，大會邀請佢多年老友譚詠麟現身頒獎，又以觀眾身份獻唱一曲。
獎門人指5年嘅總經理工作當然辛苦，但每次喺機場或街上遇到途人握住自己雙手，感激為觀眾帶來好節目同歡樂時，就會變成工作動力，所以佢特別喺台上感激香港觀眾嘅支持。
獎門人覺得總經理工作經已完成得七七八八，亦培養咗一批同事接力。佢話卸任後，可能有更多機會同觀眾見面，例如想做一啲清談節目，不過之前有總經理身份在身，好多時講嘢都唔可以太口沒遮攔，而呢點對自己特別辛苦。
卸任總經理職務之後，佢自1月21日起轉任為新成立嘅諮詢委員會召集人，繼續為TVB提供寶貴意見，獎門人仲有好多新思維想帶畀公司，所以會以顧問形式，每個月返公司同大家開會見面，佢舉例話好似AI元素，係就佢舊年推動，其實未來，佢認為TVB可以作雙線發展。
回顧總經理工作獲得公司及觀眾一致好評，不過獎門人就話準時係自己最唔習慣嘅，因為以往過慣自由人生活。問到會否覺得自己係成功嘅總經理？獎門人話「麻麻啦。（畀幾多分自己？）五十幾分。」佢解釋自己喺行政工作上仍然唔慣。
獎門人獲好友三哥苗僑偉稱讚，任內最成功係推出《中年好聲音》，而卸任對於獎門人係好事，可以多啲自己玩樂。而佘詩曼對獎門人退任不捨，但佢作出好大努力，同時希望佢可以過開心嘅生活。