佘詩曼喺《萬千星輝賀台慶2025》憑《新聞女王2》Man姐獲最佳女主角，第四度封視后創TVB開台以來最強紀錄。阿佘早前接受葉念琛節目訪問時透露為演活《新聞女王》Man姐角色，曾拜師學戲！
阿佘初入行並非一蹴而就，第一次拍劇要演喊戲，當時自己演唔到，又要三部機好近咁對住佢，當刻就係喊唔到，阿佘一度想放棄，直到遇上《十月初五的月光》呢個劇本：「因為之前俾人鬧，又話唔識做戲、又話雞仔聲，其實我都想放棄，其實唔識演不如唔好搞。」
阿佘回想拍呢套劇開大會時，得知「君好」呢個角色要剪短髮，阿佘嗰陣好長頭髮，剪嗰陣仲喺度喊，直到佢演嗰陣就明呢個角色真係要短頭髮先得㗎，加上本色演出，做一個啱啱讀完書出嚟嘅女仔，個性開朗有自信，於是就成為阿佘第一次得獎嘅劇本。
阿佘好早有拍戲慧根，曾北上開工吸收經驗，阿佘喺疫情期間爭取時間，於網上學開聲講嘢，跟老師學戲，對方俾幾條題，讓阿佘自由發揮，更陪阿佘即興做對手戲，講嘅所有對白都係即興，完成課堂後，阿佘相隔9年重返TVB拍《新聞女王》，喺裡邊用返晒出嚟，可見阿佘為精進自己演技，仍會不斷提升自己。
