踏入2026年冇幾耐，鍾鎮濤就已經馬不停蹄展開佢嘅巡迴演唱會，26年第一站去到新加坡，B哥哥繼續帶住兩個囡囡鍾懿同鍾幗父女檔上陣。
現正於北京讀研究所嘅鍾懿，完全遺傳咗B哥哥嘅歌唱天份，唔止solo環節輕鬆駕馭各種曲風，知道爸爸嘅其中一位和音病咗冇辦法上場，仲自薦頂替上場，表現亦得到音樂總監肯定。
B哥哥喺台上回憶第一次帶小鍾懿入錄音室嘅往事，當時鍾懿因為太細個，咪高峰太高，要爸爸抱住先可以完成錄音，父女合唱《閃閃星辰》時，背後大螢幕就播住當年錄音片段以及鍾懿童年相，氣氛溫馨。
一向寵妻嘅B哥哥繼續發放冧招，特登揀咗首深情嘅《家裡家外》送俾太太，除此之外，佢亦表現風趣一面，講咗個同新加坡有關嘅應景爛gag氹觀眾開心。