節目《尋歡作樂的姐姐》已經推出，何依婷、何沛珈、林凱恩、劉曉昆同埋一班幕後一齊打邊爐睇首播。食都係其次，大家最想梗係睇到精彩嘅內容啦，首集麥玲玲就帶住四位靚女率先玩轉上海，對依婷嚟講最難忘應該都係體驗猛男按摩，仲要係五男十手，不過依婷就話呢啲係導演嘅主意，佢係被迫架。
依婷雖然把口話被迫，但見佢一臉享受，睇嚟身體真係最誠實呀，至於Roxanne呢次有咩體驗？佢嘅答案真係差啲嚇親大家，事關佢一開口「有一位係不舉」，身旁嘅依婷即刻目瞪口呆望住佢「吓」咗一聲，原來Roxanne所講嘅不舉，係指嗰位男性唔可以一隻手舉起佢咋，真係想嚇死人咩。
運動擔當嘅Iris，呢次喺節目中就有唔少新挑戰，騎馬衝浪佢都勇字當頭，毫無懼色，但係講到同異性互動，佢就即刻面都紅晒，Iris對男生咁怕醜，分分鐘會斷送好多美好姻緣，睇嚟佢真係要向小鮮肉殺手昆昆學吓嘢啦。
《尋歡作樂的姐姐》星期一至五晚 22:30 翡翠台