劇集《宿敵契約》近期熱播，而近年於內地發展嘅 陳俊安 亦應邀參與演出，於劇中飾演神狗一角，忠心於男主角陳哲遠扮演嘅 鳳隨歌。
故事講述錦繡國同夙砂國對戰時節節敗退，身穿紅衣嘅女弓箭手付一笑( 李沁 飾)一箭重創敵國皇子鳳隨歌(陳哲遠 飾)扭轉戰局，遭伏擊墜崖失憶嘅付一笑後來與宿敵鳳隨歌意外重逢，更暗生情愫聯手揭露兩國權相陰謀。
Otto分享拍攝該劇點滴時話：「最難忘場口係一場騎馬戲，場戲原本係我同劇中演員輕鬆騎馬，其後導演問我哋可唔可以快跑，有騎馬經驗嘅我話冇問題。但拍攝時另一演員嘅馬匹突然衝前狂奔，我嘅馬跟喺後方當時幾乎墮馬，好在最後將馬匹拉停先冇發生意外。每次回想當時情況都覺得相當驚險，事後都稍作休息定一定神先可以繼續拍攝，好在導演話唔使重拍，之後騎馬鏡頭就改用假馬拍攝。」
原來今次已係Otto第3次同朱銳斌導演合作，更坦言每次合作都相當有挑戰性。佢指第一次朱導演邀請拍攝《寧安如夢》，當時飾演一位文官，對白比較多，更包括一啲文言文，唯有死記硬背。
到第二次合作係拍攝《白月梵星》：「我喺劇中飾演一位仙人，好多時都要鬧人，武打場面就係吊威也配合後期特效，要靠自己幻想對住綠幕演戲。而今次《宿敵契約》武打場面都係真實拳來腳往，可以發揮以前喺TVB學到嘅武打技能。好感謝朱導演對我賞識，呢三次合作大大擴闊我戲路。」
最近完成兩部電影演出嘅Otto表示，自己亦參與聯合導演一部短劇，又成立咗一個咖啡品牌，「期望2026年可以拍更多唔同類型劇集，作多方面嘗試。如果遇到合適劇本，都希望返港拍劇，再同大家再次見面。」
《宿敵契約》星期一至五晚 21:30 翡翠台