譚玉瑛 日前喺社交平台分享兩張喺醫院拍攝嘅照片，見佢精神奕奕坐喺病床，另一張就係左腳膝頭包住紗布，大家都好關心佢到底又發生咩事。
原來係因為阿譚去年2月因為心急趕返電台做節目跑樓梯，結果不慎跌倒，但佢未有理會，結果完成工作求診後發現膝蓋骨頭碎裂，需要即時做手術，不過阿譚為免耽誤舞台劇演出，影響綵排多時嘅小演員，最終堅持以打石膏方式固定位置，坐輪椅上台完成演出後，後來先再接受手術。
雖然手術拖足近一年先做，不過阿譚好樂觀，仲話手術順利：「拆線後，包紮得好似大件事，其實係步向完全康復咁解。」呢次入院亦係阿譚人生第一次入院，好在有兄弟姊妹輪流探望送湯水，令佢領略親情可貴。呢個經歷令一向自認「硬淨」嘅阿譚有唔同人生體會，凡事要學識愛惜自己同量力而為，更考慮未來搬去有電梯嘅地方居住，唔想再行樓梯。
