譚輝智 向來受客戶歡迎，近日獲合作兩年嘅品牌邀請佢同外甥仔Douglas一齊拍攝保健食品廣告，兩人做出不同互動，外甥仔Douglas面對鏡頭一啲都唔膽怯，無論表情同對白都發揮自如，導演仲好滿意Douglas嘅表現，搞到舞台經驗豐富嘅輝智都話好有壓力，但佢亦不忘大讚外甥仔嘅表現，笑言廣告商其實只係睇中Douglas，自己只係附屬品，係嚟做司機接送同斟茶遞水。
拍攝期間，堪稱中聲舞王嘅輝智同Douglas都有輕輕手舞足蹈，埋位前見佢哋練習時已經好合拍，原來平日外甥仔Douglas都有睇舅父嘅各項演出，仲大讚輝智唱歌好聽過自己媽咪，跳舞都好好睇，但自己就唔識跳《屈到病》呢首歌。輝智聽完即鬆一口氣，並笑言：「你知我點解唔帶自己仔女嚟啦，因為我啲仔女會講真話，爸爸你好苴呀，點解仲會喺到，但Douglas就好好家教，真嘢唔會攞出嚟講。」
