荷里活名導占士金馬倫作客《StarTalk》接受主播 王鎮泉 訪問，大談科幻電影《阿凡達3》嘅製作過程， 《阿凡達》宇宙源於占士金馬倫19歲時嘅一個夢，自電影第一輯喺2009年面世，成功帶動3D電影熱潮。
2017年，電影第二、三集同時開拍，占士金馬倫帶領超過3000人團隊克服重重難關。第三集更因為疫情原因，上映期足足延遲一年，喺進行真人拍攝期間不停面對停拍同重拍，最令團隊感到困難係，飾演蜘蛛俠嘅Jack Champion年紀漸長，所以劇組要爭分奪秒拍攝，否則大家會會睇得出佢唔同咗。
占士金馬倫另一個傳奇成就，就係佢就3D拍攝同動態捕捉技術發展，演員們亦好享受呢種演出方式。占士金馬倫就話，團隊每日都捕捉演員們嘅戲劇效果，佢將所有燈光同鏡頭移動、大型製作元素都拎走，令呢啲嘢同演員嘅戲劇表演分開，呢個亦係演員會鍾意動作捕捉嘅原因。 為表演捕捉演員面上101點捕捉點，Sam Worthington就話，隨科技進步，貼喺大家臉上嘅銀點已經變得越來越少，相信電影再拍落去，可以唔再需要用銀貼，只要輸入資料就可以非常準確並了解臉部生理機制，技術已經超過20年前。
占士金馬倫自細熱愛科幻故事，亦敢於發展新科技，但佢始終堅持用有血有肉嘅真人演員，更認為A.I模型無法取代真人，因為人類俾角色嘅嘢係獨一無二，而A.I只係接受資料再訓練出嚟。佢亦預測曾執導嘅電影《未來戰士》喺未來會預言成真，出現「天網」，亦認為最大威脅係超級人工智能會被武器化。
占士金馬倫除咗係發明家亦係環保先鋒，電影系列中預言地球未來會飽受污染之苦，佢希望大家未來關注環保，又分享自己認為100年後地球會變得好淒涼，所以大家必須要改變，地球自會變好。