「大哥大」洪金寶迎嚟74歲生日，兒子洪天明不時為阿爸安排生日驚喜，佢喺社交平台上載一條洪金寶跳舞影片，見洪金寶同兩個乖孫齊齊跳內地網流行嘅「海豹舞」，無論係姿態同表情，洪金寶都跳得好投入！
片中見天明一開始邀請阿爸洪金寶拍跳舞片，被洪金寶一口拒絕，當天明問要唔要同兩位乖孫洪大仁（TJ）同細仔洪竟稀（JT）一齊跳，洪金寶即流露慈祥爺爺嘅笑容，立刻笑晒口，三爺孫仲開心擁抱，天明留言：「祝全世界最靚仔的特工爺爺生日快樂！」
洪金寶因昔日拍動作戲傷患，2017年曾做膝蓋手術，按醫生吩咐減磅40磅，為怕膝頭負荷過重，近年不時坐電動輪椅外出買餸，出席重要場合則改用拐杖代步，近年洪金寶過着半退休狀態，閒時拍吓探店或生活日常影片。
