吳姍儒連續第四年為電視台主持除夕夜特別節目，今次佢會攜手前輩苗可麗，陪大家迎接馬年。節目中仲會邀請大批藝人輪流演出，不過Sandy就拒絕邀請爸爸吳宗憲做嘉賓啦！
Sandy話憲哥三月就會開騷，如果想睇憲哥表演，可以直接去佢演唱會，不過佢就投訴爸爸唔准佢去睇騷，因為話有屋企人在場，驚會太緊張影響表現，估唔到Sandy竟然話爸爸應該多磨練自己嘅實力，父女相愛相殺非常搞笑。
Sandy次次講起爸爸就完全唔留情，佢投訴兩歲幾嘅大仔遺傳咗公公嘅伶牙俐齒，仲形容係「好種不傳，壞種不斷」。佢話大仔會嫌佢沖奶唔好飲，有時前一秒話好愛媽媽，下一秒發嬲就話要換第二個媽媽，真係一啖砂糖一啖屎呀！
Sandy平日要兼顧事業同家庭雖然辛苦，但佢好多嘢都堅持親力親為，佢仲好自豪因為自己持家有道，慳番唔少家用。Sandy話自己好熱衷儲信用卡積分，曾經用積分換過全新IPhone，仲試過以超低價換到台北飛美國嘅商務艙，令在場記者嘖嘖稱奇。
