出道短短半年嘅 陳康堤Constance 近日除咗拎到新人獎之外，更即將夥拍同門師兄MC張天賦同湯令山Gareth.T一齊舉辦音樂會，呢日徐濠縈都有現身活動支持愛女。
三位新一代拍埋時佈滿歡樂聲，講到最期待嘅演出環節時，包包口快快指希望見到MC同Gareth.T跳「Big Dance」，MC毫不猶豫話「Big Boom就得」，包包又話覺得MC其實都仲好後生，搞到三位中最年長嘅MC都不禁話呢句說話仲難聽。MC每次開騷都會被追問會唔會一展舞技，Gareth.T就提議跳到攰就拋啲食物俾MC食，就好似《功夫熊貓》咁有鼓勵。
今次開騷嘅主題暗藏年齡玄機，29歲嘅MC就被笑指壓線參與音樂會，佢自都都陰陰嘴笑，仲話年齡可以係心境，自己永遠都係張三歲，並解釋自己陰陰嘴笑只係期待演唱會，因為好少可以同其他歌手開騷，認為兩位都可以俾到一啲新意念出嚟，尤其係Gareth.T。
近日黃百鳴翻唱Gareth.T嘅年度金曲《用背脊唱情歌》，喺網上勁吸like，Gareth.T都有留意百鳴哥嘅精彩演出，更多謝前輩鍾意佢嘅作品，大讚佢唱得好用力好年輕嘅感覺，非常唔錯。
