43歲謝婷婷（Jennifer）自2019年宣布誕下女兒Sara便淡出幕前，長居加拿大專心湊女，對Sara生父身份守口如瓶，婷婷去年情人節高調認愛，公開與外籍男友Mathew戀情，去年7月誕下兒子Brooklyn Milne。婷婷一家四口近日返港，未知返嚟陪屋企人過年，兼帶約6個月大嘅阿仔見吓外公謝賢同外婆狄波拉呢？
婷婷與有米伴侶Mathew組成幸福家庭後，早前搬入新豪宅展開奢華生活，近日佢分享一家入住港島區一間五星級酒店嘅影片，每晚索價過萬港元，片中見Mathew抱住阿仔飽覽維港海景，而阿女Sara喺廳玩公仔，連日見婷婷喺IG分享相約唔同嘅朋友食飯聚舊嘅照片，行程安排得緊湊。
婷婷自秘密誕女定居加拿大溫哥華，有傳謝霆鋒於2017年豪擲約3千萬送贈位於西環「維壹」千呎豪宅畀細妹作為禮物，去年婷婷以首置名義斥資過千萬港元購入跑馬地山光道新盤一個低層連平台特色戶，其後以4.1萬元租出，婷婷除咗有一個有米伴侶，本身亦係衣食無憂。
