一連兩晚嘅TVB職藝員新春盆菜宴於8號晚隆重舉行，第一晚電視廣播有限公司行政主席許濤JP率先上台發表談話，除咗感謝一眾同事過去一年嘅努力，同時亦有好消息宣布，就係有人工加，主席一宣布完，全場即時歡聲雷動，連阿姐 汪明荃 都話覺得好鼓舞。
主席仲話雖然經營環境好艱辛，但TVB喺免費電視方面佔有率高達八成，可以話係壓倒性優勢，而2025年嘅廣告收益比起2024年亦有所增長。
雖然呢晚氣溫偏低，但盆菜宴現場仍人聲鼎沸非常熱鬧，即將播出嘅新劇《非常檢控觀》由 馬德鐘 同 陳煒 帶隊到場宣傳，中聲家族更加係人強馬壯，中1至中3齊集，大家食得開心之餘，亦不忘恭喜 車婉婉 勇奪最佳女主持。
《聲秀》嘅 甄敏芳、《聲夢》嘅 林智樂 同 何晉樂 、中聲3嘅 占士丁丁 同 張與辰 輪流獻唱助興，見到同事們咁High，連車婉婉都忍唔住上台唱埋一份。
與辰唱新歌《NOVARA》時，中聲3歌手全部衝上台伴舞，成班人由台上唱到台下，成功帶動全場氣氛。與辰仲自爆上年盆菜宴已經好想參加，但由於仲比緊賽，所以未有入場券，等足一年，今年終於圓夢。
