新劇《非常檢控觀》將喺1月19號首播，近日劇中演員齊齊傾力宣傳。劇集陣容包括馬德鐘JoeMa、陳煒Alice、賴慰玲WinkiLai、吳偉豪RiccoNg、游嘉欣KayanYau、張馳豪Aska、丘梓謙Adrien Yau等，呢個組合幾新鮮。
1月8號係丘梓謙嘅32歲生日，咁啱呢日佢早上就要開拍處境劇《愛‧回家之開心速遞》，收工之後就要會合《非常檢控觀》嘅劇組拍攝宣傳片，喺等候期間就收到馬神同煒哥送上嘅神秘生日驚喜，兩位前輩毫無架子，親自點蠟燭，再由馬神好Man咁掩護住煒哥，將蛋糕送到壽星仔面前，一眾演員為佢唱生日歌慶祝生日，睇得出佢哋整個劇組好融洽。
丘梓謙事後將呢個珍貴片段擺上社交平台分享，話自己過咗一個好充實嘅生日，整日工作又有人唱生日歌佢聽，好多謝真係好感動，係佢32歲嘅一個好開始，不忘叫大家記得1月19號支持《非常檢控觀》。
