足球金童 碧咸 同 維多利亞 兩公婆，近日同大仔布魯克林正式決裂，布魯克林唔單只大動作寄出律師信，要求父母唔可以直接同佢聯繫，所有對話更要通過律師轉達，佢仲喺IG上集體封鎖父母同三個細佬妹，正式同屋企人劃清界線。
根據英國媒體報導，今次封鎖事件嘅導火線，係布魯克林嘅一段烤雞影片，事源上個月維多利亞喺布魯克林嘅IG烤雞影片俾個Like，而就係因為呢個like被視為違反先前律師信中「不得在社群互動」嘅要求。布魯克林事後大動作封鎖父母，連細佬妹都唔放過。碧咸20歲嘅三仔克魯茲事後透露，全家人一覺瞓醒發現被封鎖，非常無奈。
碧咸兩公婆同子女嘅關係一向好緊密，但有消息話自四年前大仔布魯克林嘅婚禮上，因為婚禮歌手大讚維多利亞係「全場最美」，導致身為女主角嘅新娘Nicola Peltz覺得受羞辱，種下「婆媳」之間嘅嫌隙。
加上二仔羅密歐同大佬布魯克林嘅前度曾經交往，兩兄弟早率先反目，一家人關係亦開始生變，最後漸行漸遠。據知大仔布魯克林已經有超過一年時間冇同父母交談，就連上年碧咸50歲大壽都不願出席。 雖然大仔表現決絕，但始終天下父母心，碧咸曾經唔止一次對外表示，屋企嘅大門永遠都會為布魯克林敞開。曾經人人稱羨嘅完美大家族，演變成豪門鬥爭肥皂劇，都真係幾唏噓。
