袁偉豪 同 張寶兒 2020年結婚，並育有2位小朋友，婚姻生活非常美滿。不過日就有網民重溫一段舊片，就係阿Ben喺2018年同周勵淇合作拍片時，對Niki講過一句：「我銀包得返廿蚊，點敢追你呀？」 阿Ben同Niki當年喺《再創世紀》一劇飾演情侶，但最終悲劇收場，所以Niki就邀請佢作客自己網上節目做嘉賓，二人「再續情緣」做一日情侶。
二人喺一個大牌檔食飯時，氣氛好好，仲提起Niki曾經一張箍牙相。阿Ben就向鏡頭問：「點解你唔問我，喺地鐵見到佢箍牙個樣仲追唔追佢？」Niki答：「我箍牙又唔係做咩壞事，箍牙幾靚？」阿Ben就話：「我就係鍾意你呢樣嘢，箍牙有罪咩？」 之後Niki再問：「如果當年你會唔會追我呢？點解你唔追我嘅？係咪因為我唔夠靚？」而阿Ben就淡然回應：「我銀包得返廿蚊，點敢追你呀？」Niki就話：「可能真係得㗎。」
再又傾到阿Ben鍾意嘅女仔類型時，Niki就話阿Ben而家係鍾意Bowie嗰一款，但阿Ben就話：「唔係啊，你我都鍾意㗎。因為我知自己高攀唔起你先冇追你。」 呢段對話片被網民舊事重提分享後，隨即成為熱話，亦有人分析，阿Ben同Niki除咗《再創世紀》，仲拍過《桌球天王》、《好心作怪》、《流氓皇帝》呢三套劇，而阿Ben所講嘅「得返廿蚊」時期，極有可能係《桌球天王》時期，當時Niki已經係人氣火爆，阿Ben就係加入TVB冇耐，身份懸殊。
