TVB職藝員新春盆菜宴第二日，大家繼續熱熱鬧鬧開心一晚，行政主席 許濤 繼第一暟宣布新一年將會加人工，第二晚主席都再一次親口師同事宣布呢個好消息，連《愛緊回家之開心速遞》一眾演員都覺得好鼓舞。
豹哥 單立文 搞笑話丹爺 劉丹 因為人工已經太高，所以冇空間再加，反而自己同 呂慧儀 因為人工低，所以就可以加到，阿蟹聽到豹哥咁講，即刻猛咁點頭。
羅子溢 雖然喺台慶頒獎禮失落視帝寶座，但見佢依然心情大靚，講到太太楊茜堯第一時間出咗個post安慰佢，子溢當然覺得好sweet，佢話雖然冇得獎，但得到觀眾鼓勵已經覺得好開心，最重要係新一年繼續有工開。
至於勇奪「最佳女配角」嘅 王敏奕 以及 蔣祖曼 就話，因為今年盆菜宴係頒獎禮之後先舉行，大家唔使拉票又唔使節食，可以食得再盡興啲，佢哋仲透露《新聞女王2》劇組已經約定咗會搞慶功宴。
感情失意嘅 陳庭欣 同 何沛珈 喺新一年除咗寄情工作，當然都希望可以有新嘅桃花，尤其阿Bob林盛斌喺頒獎禮上承諾會幫Toby物色新對象，Toby就話好多謝阿Bob費心，但自己就覺得一切隨緣。
第二日繼續有歌手唱歌助興，聲秀嘅 馮熙燮 同 穎喬 輪流上台獻唱炒熱氣氛。不過最驚喜係 朱敏瀚 都大開金口騷歌藝，唱咗首《歲月如歌》。朱仔謙虛話自己唱歌唔係sell歌藝，而係sell感情。
事實上朱仔唱歌都真係幾有水準，不過唱唱下佢嘅好兄弟 張振朗 同 周嘉洛 突然衝上台搞氣氛，之後成班人跟住衝上台喊encore，朱仔喺振朗同 吳業坤 助唱下再唱多一次，為盆菜宴增添更多熱鬧氣氛。
