胡渭康 號召一眾歌手朋友現身慈善音樂會記招，宣布嚟緊將會開騷為大埔災民籌款，而當中一位演出者就令大家有驚喜，佢就係康哥嘅小學同學 何啟南 。南哥早前跟康哥到過渡性房屋探望受影響居民，得知佢哋有足夠物資，但面對法務問題就比較徬徨，所以今次音樂會籌得善款會用於法務事項上。
康哥又話兩個月前同劉威煌一齊見證南哥喺台上演出，當時台下女士為之瘋狂，而呢一幕亦令佢覺得今次慈善騷一定要邀請南哥參與。康哥感激大家二話不說答應支持，正如顏米羔同涂家堯都話收到康哥電話時，完全冇問詳情就答應參與，家堯話康哥每次都係親自致電邀請，呢份誠意係一定要支持。米羔就覺得應該加場，康哥即笑住唱出歌詞「開夠六千場。」
文佩玲、李樂詩當晚會聯同何婉盈以全新組合Super Queen首次上台演出，佢哋話呢個名係佢哋思前想後得出，嚟梗除咗會唱經典歌，仲會推出新歌，而演出當晚仲會排舞演出。支嚳儀一直樂於參與慈善活動，私下亦每個禮拜行善向獨居長者派蘋果，呢份善心亦承傳畀囝囝。沈宗賢就話希望一直以歌聲行善，幫到更多有需要嘅人。
