古天樂 同 宣萱 呢日到台灣為新戲宣傳，呢次古仔同Jessica仲喺當地出席謝票活動，吸引唔少影迷搶飛。古仔早前因為身體不適驚傳入院而缺席內地宣傳，所以大家呢日都好關心佢身體情況。
古仔就話自己只係小感冒，不過宣傳活動仲有好多，所以先會去睇醫生。被問係咪感冒後可以多啲時間休息時，古仔就話自己習慣12點之後工作到凌晨3、4點，而且都瞓唔得幾多時間。
曾經同古仔合作過嘅 劉冠廷 都有現身宣傳記招，仲帶埋一束好特別嘅薯塔花嚟送俾古仔。劉冠廷就話，曾經同古仔合作，殺青後二人好少見面，每次行夜市見到薯塔都會諗起古仔嘅招牌旋風簽名。
古仔嘅Fans年齡層廣泛，最近有位4歲小妹妹向佢隔空示愛，話大個之後要同佢結婚。古仔得知後雖然嚇咗一跳，但佢都好霸氣用一句：「等你！」回應小影迷。
