衛詩雅 日前出席代言嘅運動品牌活動，期間提到同老公 周祉安 醫生 度過一個難忘至極嘅聖誕節。Michelle指因為自己要拍攝，無法同老公出席聖誕派對，不過注重儀式感嘅周醫生，原來一早已訂製神秘禮物，令Michelle充滿期待。
不過呢日受訪時佢就堅拒公開禮物到底係乜，仲叫現場傳媒朋友要留意社交平台，不過佢越講就越似話中有話，搞到一眾記者朋友頭都大，現場仲似乎彌漫住一陣令人不寒而慄但又不明所以嘅氣氛。
結果，Michelle星期六就公開影片，原來周醫生已佢勇奪金像獎影后嘅得獎相片訂製3D公仔，不過可惜結果就慘不忍睹，連廠商都自知唔合格，自願重造一個，之但係效果依然非常麻麻。片中收到禮物嘅Michelle一直大讚老公有心思，不過蕭瑟氣氛就似乎極為濃厚，加上結尾嘅姑婆式笑聲，相信周醫生聽到一定毛管楝，只能夠衷心祝福你2026年夫妻和諧、仲要以後記得慎選禮物喇。
