粵劇名伶阮兆輝 同 尹飛燕嘅兒子 阮德鏘 ，與現職港台DJ 林司敏 ，因合作電影《天生愛情狂》而撻着，兩人喺2018年結婚並育有一女阮婧恆。疼錫家人嘅阮德鏘，不時會喺社交平台分享佢同囡囡嘅生活照，偶爾亦會放下閃，出PO曬太太嚟探班等。
正當大家以為呢一家三口恩愛如昔時，阮德鏘於 11 號突然於社交平台發長文，指與太太已於2025年離婚：「2025年我們離婚了。我選擇暫時停下所有工作來面對這事實，因為我的工作關係拖延到現在才宣佈，感謝妳對我作岀了最後的包容，希望這遲來的宣佈，沒有讓妳的新生活做成太大影響，相知相識，好聚好散。」阮德鏘指離婚從來都無咩原因同理由，唔理你嘅文學修辭有幾高，或分開嘅理由有幾牽強，到最後都係一段關係嘅結束。
阮德鏘於文中感謝太太呢十幾年嚟為呢頭家嘅付出，佢指自己從來都唔係對方嘅Mr. Right，感謝對方畀時間佢進步：「或許正如我打的比喻，妳岀現在我的生命裡。是上天派來彌補我童年的創傷，現在的妳功德圓滿了，也是時候了。」
離婚後，囡囡阮婧恆將會跟住爸爸一齊生活，阮德鏘直言自己唔可以冇咗個女：「謝謝妳留下了女兒來陪伴我繼續走下去。沒錯。我的而且確很需要女兒才能支撐下去。」文中亦有暗示離婚一事發生得相當突然，突然到佢無暇反應過來，只可以用盡所有氣力，喺最短時間內撐起一切嚟保護個女：「我和懂事長（指囡囡）都沒有多餘的時間來消化當下的實際情況和情緒，我們只能用巨蟹座的天賦，堅強的外殼，強行支撐，互相扶持。渡過了艱難的日子。」
翻睇阮德鏘過往嘅post，去年6月嘅父親節，林司敏仲有同囡囡、爸爸一齊去到中山探喺當地拍戲嘅阮德鏘班，直到去年嘅9月26號，阮德鏘突然有感而發，於帖文中表示：「人生中經歷了不同的歷練，學會享受一個人的光陰，要學會照顧別人先要學習愛惜自己。把自己擁有和失去的都環顧一圈，才知道什麼是得什麼是失。從頭再來不難，難在怎樣才算活得精彩？」兩夫妻似喺呢個時段感情生變。
而 林司敏 亦於其社交帳號發文回應前夫嘅離婚文：「2025～正式告終了～我從來不寫一字，因爲我相信我的付出一定有人目睹。而有些事情，只出現在你的文字中，我並不完美，也不想去做那個你文字中完美的我，就讓那樣的人留在文字裡吧！可能是我累了，可能是我醒了，可能是真的緣盡了。感情無分對錯，只是緣起緣滅，只是一念之間，感激相遇，感謝相伴，感恩一切。2025。我把自己還給自己了。」
