學生時代因為一張手持奶茶照而被網民封為「奶茶妹妹」嘅 32歲內地企業家章澤天，由於其丈夫為現年52歲嘅內地企業京東集團創始人劉強東，故章澤天嘅舉動備受外界關注。最近章澤天於網上平台開設名為「小天章」嘅播客，單係宣布首集會訪問劉嘉玲嘅預告片，上線一個鐘就已經有破萬點擊。
喺預告片入面，章澤天先表示好開心可以嚟到劉嘉玲家中錄製呢個訪問，之後嘉玲就分享關於呢間屋嘅故事，佢指喺1995年時，自己家住18樓，而哥哥 張國榮 就住喺9樓，嘉玲表示佢哋之間有好多好難忘嘅回憶，就好似當時 鄧永鏘 讚佢間屋嘅佈局好靚，於是就提出為佢裝修呢間屋，當時嘉玲欣然答應，於是鄧永鏘就為嘉玲將間屋設計成大家喺片中所見嘅樣子。嘉玲直言非常喜歡對方嘅設計，所以有時佢請客食飯，或者係開party，佢都會選擇喺呢間屋舉行。
而另一條以「那些大自然教給我們的事情」為題嘅預告片，章澤天就分享自己嘅個人經歷，佢指本身自己係唔鍾意戶外嘅人，因為佢唔鍾意曬，直到有一次去不丹行一座海拔三千多米嘅山，當時一直落住濛濛雨，佢哋一行人走走停停，當章澤天停低飲水時，就見到一棵樹上開咗一枝花，仲要非常鮮艷，佢指由於當時海拔成三千多米，又已經快過花期，所以當佢見到呢枝淋雨嘅花時，自己心中就有種感動，而嘉玲就借呢朵高嶺之花，指大家都應該要有呢朵花嘅精神，無論喺咩困苦嘅環境入面，都要有求生嘅意志力。