新劇《非常檢控觀》將喺19號晚首播，劇集裡面會有唔同嘅單元故事推出，其中兩對主角 馬德鐘JoeMa、 陳煒Alice、 吳偉豪Ricco 同 游嘉欣KayanYau坐喺電單車上型格登場，馬神一段時間冇喺螢幕同觀眾見面，依然Fit爆充滿男人味，佢都好開心可以喺2026年嘅頭炮有劇集同觀眾見面。
不過今次劇中馬神同煒哥嘅關係就唔算和諧，針鋒相對，尤其煒哥仲刻意針對馬神，二人拍劇期間，馬神從未獲得煒哥善待嘅眼神，笑指雖然煒哥經常萬歲同劇組開餐，每當見到煒哥對佢嘅眼神時，就會諗煒哥會唔會喺食物落毒。
吳大強Bill同吳偉豪RiccoNg拍呢套劇，首次以父子檔上陣，回想返當時大強初次接觸拍劇都覺得超級緊張，幸好有阿囝從旁指點，又有嘉欣嘅細心協助，大強覺得拍劇同唱歌各有不同，最初開工有壓力，所以Ricco有睇住爸爸，又會放飯時攞飯盒畀爸爸食，兩父子希望觀眾鍾意佢哋嘅演出。而游嘉欣今次破格演烈女，對吳偉豪又打又鬧，同過往角色好極端。
張馳豪Aska為劇集獻唱主題曲之餘，仲會同賴慰玲Winki上演姊弟戀，Winki自稱係嬌俏擔當，而Aska面對住心目中嘅女神姐姐即刻變成怕醜仔，試過有場戲Winki叫Aska可以攬一攬佢，點知出嚟效果完全唔收貨，Aska自認攬女嘅經驗不足，Winki就自嘲魅力唔夠。
