今日(13日)係劉丹81歲生日正日，《愛·回家之開心速遞》劇組不嬲最有愛，當然會幫呢位熊家大家長賀壽啦！呂慧儀喺IG分享熊家生日party相，除咗丹爺，仲有其他三位一月壽星 滕麗名 陳浚霆 同 張景淳 一齊慶祝。
熊家全員出動，呂慧儀、單立文、周嘉洛、湯盈盈同古佩玲開心大合照，阿蟹寫到「一年一度一月份熊寶寶壽星宴，親愛的阿爸今日正日生日快樂！Happy Birthday to all January babies」。
四位壽星都有一個專屬嘅特製蛋糕，除咗有佢地Q版人形牌，仲有符合個人特色嘅設計。丹爺嘅蛋糕有金壽桃，兩邊寫住「福如東海」同「壽比南山」；阿滕嘅蛋糕就重現佢嘅滑雪英姿；龔燁張景淳出名唱得，所以蛋糕上有個咪高峰；風少陳浚霆嘅蛋糕就以電影菲林膠卷重現佢過往演出，非常有心思。
《愛．回家之開心速遞》星期一至五晚 20:00 翡翠台