樂壇天后陳慧琳（Kelly）喺魚龍混雜嘅娛樂圈，一直受經理人鍾珍保護，多年嚟保持初心，出淤泥而不染，盛傳陳慧琳喺圈中冇人敢動，外間一直流傳「都市傳說」，稱資深演員陳惠敏係陳慧琳叔叔或姑丈，陳惠敏最近開設社交平台頻道大談娛樂圈趣事，親解二人關係！？
陳惠敏聞言一臉認真澄清與陳慧琳冇親戚關係，透露與陳慧琳父親相識，曾見過一、兩次面，對陳慧琳呢位世姪女讚不絕口，覺得呢個女仔非常非常好。
陳惠敏記得嗰時陳慧琳啱啱喺娛圈彈起，自己曾講過一句「你搞邊個都好，唔可以搞陳慧琳」，可能因為咁樣令人覺得佢哋有親戚關係。陳惠敏表示陳慧琳喺娛樂圈嘅成績，大家有目共睹，自己亦冇諗過呢番說話，令外界產生誤解。
