1月13號踏入39歲嘅 高海寧 今年過得非常充實，慶祝飯局更係一個接一個，壽星女更收到唔少花束同蛋糕，真係切蛋糕都切到手軟呀。咁開心嘅moment ，高Ling都有將相片上載到社交平台，同大家分享喜悅，佢更寫上「祝我生日快樂﹗愛你們﹗」。
相中所見，高Ling除咗 胡定欣 等好友一齊食飯慶生外，正忙於拍攝新劇《璀璨之城》嘅佢，更獲劇組台前幕後同佢慶生。而高Ling唔少粉絲亦特別到珠海取景地探班兼為佢慶祝，同劇嘅演員 楊證樺 咁啱在場，更一齊唱生日歌助興，氹得捧住蛋糕嘅高Ling不知幾開心，佢更興奮到大放表情包。
高Ling唔單止收到粉絲送嘅花束，仲收到好多有心思嘅禮物，當中除咗有DIY小手工之外，更有一張水蛇春咁長嘅生日賀卡，真係充滿愛啊﹗
