嚟緊3月將再次舉行紅館演唱會嘅黎明，無預警下突然update社交平台，仲上載咗一段以海賊兔為題嘅片段宣傳演唱會。片中開頭Leon用咗佢首名曲《只要為我愛一天》做BGM，然後見到三隻頭戴cap帽嘅兔仔勇闖雪山，其中一隻頭戴藍色帽嘅鬈髮兔仔，就向戴紅色帽身披紅色披風嘅兔仔講「你唱隻歌壯下膽先」，然後另一隻兔仔亦和應「咁睇你喇」。
之後紅色帽嘅兔仔就好以充滿力量咁，意志堅定點點頭表示「好呀」，然後從容不迫唱起「若你用我的感情愛一天……」突然鏡頭一轉，就見到兔仔由高峰笨豬跳一躍而下，此情此境係咪好熟口熟面呢？呢一幕就係Leon 97年拍電訊公司廣告「要贏人先要贏自己」嘅集體回憶，各位就算唔係Leon Fans都一定會記得呀﹗
片段曝光後，Leon嘅粉絲火速回應，而佢嘅好兄弟兼好拍檔雷頌德亦秒覆，佢留言打咗兩個拍手兼心心眼嘅emoji，有粉絲更問Mark會唔會由英國返港支持。