《聲秀》冠軍 馮熙燮 完咗比賽短短兩個月就推出第一首派台歌《聆聽自己嘅聲音》，呢日粉絲仲幫佢搞咗個聚會，大家一齊傾吓偈玩吓遊戲，氣氛熱鬧。Ryan話好開心可以同粉絲近距離接觸，而粉絲連MV當中出現嘅場景內容都如數家珍，例如其中一幕小巴嘅車速粉絲都可以即刻回答，亦令Ryan驚喜又佩服。
講起呢首派台歌，Ryan就話好多謝公司嘅用心，令到首歌可以傳達出自己嘅心聲，呢日Ryan特登戴上MV中嘅耳機做造型，佢話希望大家見到耳機就會諗起佢首新歌，仲搞笑話如果唔會壞嘅話，連沖涼都唔想除低。
《聲秀》嚟緊18號就會舉行畢業演唱會，Ryan預告自己首歌會喺當日首唱，而踏入新一年，佢都希望可以陸續推出新歌，希望可以做到每一首歌之間都有關聯。
