黃凱芹呢日現身記者會，宣布舉行紅館演唱會慶祝入行40周年，呢次亦係佢相隔四年再舉行紅館演唱會。
得知開騷嘅消息後，黃凱芹坦言相當開心，佢指除咗要準備演唱會嘅內容外，亦要準備一啲周邊事情，例如做一隻紀念性質嘅專集。黃凱芹指人係會不停改變，會長大，所以每一個階段都會有啲新嘢，而佢覺得每一次出現，自己都會因為成長而有一啲新嘅元素，所以佢唔會為演唱會夾硬整啲新嘢，只要原汁原味做自己就可以。
除咗開騷外，黃凱芹仲搵嚟阮兆祥、周慧敏同余劍明推出合唱歌，鄭丹瑞亦特別獻聲錄獨白，但黃凱芹話原本呢個plan係更大，佢本身打算搵佢哋年代嘅幾位DJ外，仲想搵嚟佢嘅前輩林珊珊、何嘉麗與鄭丹瑞一齊合作，黃凱芹指由於呢件事係由佢嘅演唱會監製負責聯絡，對方就覺得只要搵到阿旦後，大家都會答應，但因為監製一日未搵到阿旦，其他人就唔知有呢個合作，最終錯過咗時機。至於問到會唔會將呢個遺憾放喺演唱會上實現返，黃凱芹就未有正面回答，但就話希望恩師鄧藹霖可以現身佢個演唱會。
網上有人質疑黃凱芹係咪做過醫美，對此佢否認此事，佢話係大家太鐘意P圖，P到張相都唔似佢，黃凱芹仲話認識佢嘅人都知佢唔會花呢啲錢，之後仲表示身體髮膚受諸父母：「既然我阿媽生得我咁好，何苦呢係咪！」