賀歲片《夜王》誓要跟大家一齊尋「歡」，以夜總會為背景，「歡哥」黃子華同「V姐」鄭秀文 (Sammi)既係前度又係冤家，關係錯綜複雜，演出戲「魅」非凡，其中一場由賭場鬥到情場嘅「聚舊」重頭戲，連導演也拍得叫爽！
Sammi與子華由第一次見面傾劇本到正式拍攝，全程拍得放，演得令人賞心悅目，子華為咗拍攝床戲部份，拍完第一句就話「你知唔知我為咗呢場戲忍咗幾耐口？你擺到最後先拍」， 至於子華同Sammi繼《失戀急讓》後再次合作，子華形容有願望成真嘅感覺：「其實《失戀急讓》中，我同Sammi幾乎冇乜對手戲，我一直都好想同Sammi有一次正式合作，呢次拍得成呢部戲簡真願望成真，好順暢。我哋兩個一拍就已經有一種好自然嘅默契，呢種默契裡面又有啲似冤家，又有啲似情人，自然就有呢種情緒，我覺得幾有趣。
子華喺《夜王》與不少《毒舌大狀》班底在同樣好有默契，笑指喺現場覺得有啲尷尬，因為大家著得好性感：「呢個陣容相信係過往廿年嘅港產片，大家都未見過，而難得嘅係每一位都好投入，恰如其分做舞小姐。如果你要問我，呢次由《毒舌》幾個女孩子發展到而家咁多人嘅場面，要我評分嘅話，我會畀一萬分！」 《夜王》除咗一眾舞小姐閃耀登場，作為賀歲片總要為大家帶嚟歡樂，呢個重任就落喺楊偉倫（阿卵）身上，連子華都點名讚賞：「我好替土地（阿卵飾）擔心，我相信佢演出呢套戲之後，唔可以再做其他戲。因為佢將會成為香港一個笑匠，每一場只要有阿卵嘅戲，都係非常好笑。大家到時入場，不妨帶著期望嚟，我相信你都唔會失望！」
歡樂背後係要付出代價，子華坦言拍《夜王》真實情況係恐怖：「為咗呢部戲，我講咗三世人份量嘅粗口，同吸咗十世人份量嘅煙。我要強調大家見到我哋吸煙真係唔好學，我真係為電影犧牲咗我嘅肺！但冇辦法，喺夜總會嘅世界，不論男女，大家都係講粗口、吸煙。為咗營造真實夜總會世界，我哋為《夜王》作出一次犧牲！」 夜總會文化曾經一度好風光，尤其尖東一帶，子華曾經歷過呢年代：「我想呢部戲裡唯一去過夜總會嘅，只有我同導演，其他所有四十多歲以下嘅人，未去過夜總會，夜總會對佢哋嚟講係完全陌生嘅文化。而作為演員，你冇拍過夜總會戲，女嘅未做過舞女，男嘅未做過古惑仔，你唔算係一個成功演員，我哋曾經歷過嘅嗰個電影世界，一度以夜總會故事為主流題材，當然反映社會當時文化，反而而家好多人對夜總會完全唔認識。所以我就講呢部戲同時係懷舊之餘，又好似帶大家睇一個新樂園，好新奇。」
《夜王》「東日夜總會」所處嘅那個年代，夜總會已差唔多成為夕陽行業，跟現在全球各行各業嘅衰退、面對經營困難如出一轍。子華感慨稱導演早已覺得未來幾年好艱難，呢部戲今時今日出現可能更應景，而《夜王》講夜總會最艱難時候，亦係今日世界各行各業嘅縮影，鼓勵大家「世界艱難，我哋照行」。
而導演構思歡哥同V姐酒店「聚舊」戲份可謂花盡心思，「成年人嘅感情好複雜，我鍾意呢種複雜嘅感覺。我一路都想寫一段游走於深愛、憎恨、關懷、鄙視、幫助、傷害、義氣與出賣之間嘅關係，呢次就放喺歡哥與V姐身上。二人喺酒店房嗰場戲，重點就係要睇嗰種複雜嘅情緒。兩人感情戲其實係由賭檯開始蘊釀，由互相試探開始，到聯手贏大錢嘅興奮，到床上，吵架到反目，再到體貼，最後各走各路，帶點後悔、帶點不忿。將咁多強烈情緒放喺同一場戲上，睇子華與Sammi嘅火花，好好睇」。