近年愛上打網球嘅周杰倫，不時會相約好友一齊打波。14號周董就以球員身份，參加澳洲網球公開賽表演型賽事「One Point Slam（一球制勝）」，不過對上澳洲職業陪練員Petar Jovic嘅周董，連球都冇掂到就已經輸咗賽事，賽後周董都喺社交平台自嘲：「果然被我料到 連球都沒碰到🤣我在場邊能做的 就是幫大家簽名了😁」並附上自己於球場邊為球迷簽名嘅照片。
周杰倫今次參加嘅賽事，係由澳網推動嘅「一球制勝」表演賽，雙方球員要以一球定生死，僅憑一分決定晉級定淘汰。以「名人外卡」身分登上澳網賽場嘅周董，喺抽籤時就抽中專業陪練員，而猜拳決定發球次序時，亦輸咗畀對方。
15號周杰倫與太太昆凌再到場欣賞賽事，周董再次幽自己一默，於限時動態貼出二人嘅合照，並寫道：「這個通道昨天讓我有點緊張」。
