藝人工作壓力太大，因工作操勞、睡眠不足，導致免疫及神經系統失調，甚至出現皮膚敏感等問題。劉佩玥（Moon）作客阿Bob林盛斌嘅健康資訊頻道，分享喺2021年拍劇期間「生蛇」嘅經歷。 Moon憶述當時因拍攝要夜接日、日接夜開工，一開始只係打一個乞嚏，背部神經就扯住痛，佢誤以為係肌肉痠痛，冇即時求醫，錯過咗72小時黃金治療時間，直到第五日皮膚出現水泡，有火燒、觸電一樣嘅痛楚，令阿Moon半夜痛醒。
Moon形容抽痛感覺似有煙頭、香頭焫著皮膚，「一下一下」持續成晚，連眼角附近都有起泡。最後阿Moon緊急求醫，好在醫生話係免疫系統問題影響到皮膚，未有影響視力。自此，Moon好關注自己免疫系統嘅問題，亦提醒大眾要好好照顧自己身體，希望大家唔會經歷「生蛇」嘅辛苦同痛，有需要可以打「蛇針」預防。
查實Moon除咗「生蛇」，自2015年起受皮膚病困擾，免疫系統出事患上早期嘅玫瑰痤瘡，Moon全臉泛紅發熱，最初以為係普通暗瘡，服用類固醇及抗生素均未見效，有感皮膚問題影響工作，令佢感到非常困擾，經診斷確診為玫瑰痤瘡，Moon後嚟透過搽藥膏配合改善飲食習慣，達到良好控制及緩解。
