周吉佩 、 張與辰 為一個關懷聽力嘅慈善演唱會擔任表演嘉賓，呢日佢哋同 林建煇 醫生一齊綵排。吉吉自爆曾經因為感冒而令左耳聽力只剩三成，令佢非常擔心，好彩經過治療後已經冇大礙。而與辰就表示第一次學潛水時冇感覺氣壓好重，直到返到屋企先感受到右耳有啲聽唔到嘢，醫生就話有可能係有細菌入耳，或者係耳仔未習慣氣壓。
除咗參與慈善演唱會，吉吉嚟緊都有一個好特別嘅表演，就係喺馬戲團帳幕中開騷，所以佢都構思緊有咩元素可以擺入表演之中。吉吉笑言自己擅長拋橙，不過吉士粉就提議佢踩單輪車，要佢向難度挑戰。
至於與辰就積極投入新歌製作階段，佢透露唔係再挑戰快歌，因為跳舞真係好攰，要唱返可以坐喺度唱嘅歌。
中聲家族出名感情好，中1生日前就搞咗個聚會，順便慶祝車婉婉勇奪最佳女主持。吉吉就話，中一生重聚已經係年幾前嘅事，所以大家都好開心飲到醉曬，婉婉都好感動，最後搞到喊曬口。
