王梓軒自編自演嘅英語微短劇《選美兄弟班》（Rags 2 Richmond）於2024年底以網劇形式登場，上線首月獲逾900萬點擊，反應甚佳，更一度掀起追劇潮，隨即開發電視電影版權相關項目，王梓軒、石祐珊及導演Simon Yin三位主創團隊，把短劇延伸製作成電影版。
該片邀得曾志偉，薛家燕加盟劇組，日前電影拍攝工作已順利完成，王梓軒首次擔任電影製作人，佢坦言：「真係差啲壓力爆煲！」 向來工作繁忙嘅志偉，呢次喺王梓軒誠意打動下，參演電影版，更特意遠赴加拿大開工，卻只能喺當地停留72小時，為抓緊時間，連Jet Lag都未過就立即埋位，可見志偉相當專業，該片又去咗溫哥華商場取景，吸引大批影迷及途人拍照。
志偉今次有份參與電影版，仲可以同家燕姐一齊拍，佢都好開心又好享受拍電影，雖然今次唔係第一次拍西片，但係外國劇組有工會制度，就算今次佢只係逗留72個鐘，劇組都照顧得佢好好，有足夠時間休息。
志偉指香港拍電影以效率見稱，唔同地方有唔同文化：「其實係各有優點，作為演員，我兩邊都好享受。」據悉呢次電影拍攝工作，更係志偉卸下「總經理」身份後首個「新工作」，無論台前幕後亦喜迎志偉到場，趁拍攝空檔紛紛把握機會與志偉交流、合照。
難得有大前輩坐鎮，首次擔任電影製作人嘅王梓軒，坦言壓力爆燈：「真係要特別多謝志偉哥同家燕姐，喺百忙中抽空飛嚟加拿大拍攝，佢哋啲期好難度㗎！我哋當然唔敢怠慢，事前已經傾好晒點做，因為志偉哥只有兩日一夜嘅拍攝時間，我哋唔想錯過每分每秒，不過佢一roll機就即刻進入狀態，非常專業，睇到我哋個個工作人員拍晒手。」
王梓軒笑指現場工作人員都打醒十二分精神：「佢哋知道係志偉哥，即刻話係『China’s Jack Nicholson』（積尼高遜），個個都知西片版《無間道》嗰個『大佬』！」 王梓軒又表示由劇本、微短劇到搬上大銀幕，整個過程籌備足足5年，早前微短劇更奪得溫哥華亞洲電影節（VAFF） 「Ovasian Impact Award 最具影響力獎項」，為整個團隊打下一支強心針，王梓軒覺得喺電影版開鏡前得到呢個獎，真係特別有意義，該片現時正密鑼緊鼓進行後期製作。