今個星期《電影泉攻略》繼續由 王鎮泉Jeoffrey 帶觀眾睇吓有咩電影資訊。
電影《阿凡達3》全球票房成績都唔錯，連帶仲將女主角Zoe Saldaña 一舉送咗上去全球影史上作品累計票房最高演員嘅寶座，累積票房已經有150億美元，相信《阿凡達》呢張長期飯票，將來仲可以幫Zoe再創紀錄。
呢次Zoe破咗Scarlett Johansson之前 148億美元嘅紀錄，計返單係《阿凡達》系列嘅票房已經有65億美元，加埋Zoe之前喺《銀河守護隊》、《復仇者聯盟》同埋《魔盜王決戰鬼盜船》呢啲大作嘅演出，難怪佢可以坐到呢個位。
本周新片速遞有：
《讓悲傷長出翅膀》Benedict Cumberbatch主演，劇情講述一位爸爸喪妻後，剩低自己面對兩位愛兒，曾經嘅安樂小窩逐漸變得冷清，孤身一人嘅佢唯有藉創作排解對亡妻日益加深嘅思念。某日佢嘅悲傷成魔長出翅膀，一隻巨型烏鴉從佢嘅草圖中誕生，到底係思念亡妻嘅幻覺，定係創傷後遺嘅瘋狂？
《28年後：人骨聖殿》喺喪屍橫行嘅末日，人類存亡界線早已模糊。卡爾森博士捲入一場危險關係，即將引爆顛覆世界秩序。年輕倖存者史派克被迫與神秘領袖占美交手，墜入真正的人間地獄。這裡，倖存者比感染者更可怕，佢哋建立嘅秩序，比喪屍更詭異，比黑暗更駭人。
甜茶 Timothée Chalamet 同佢嘅超模女友 Kylie Jenner而家成日會將頒獎典禮當成佢哋嘅拍拖聖地，好似之前喺Critics Choice Awards上，甜茶就稱呼Kylie為伴侶，而喺剛剛過去嘅金球獎上，奪得影帝嘅甜茶就大方感謝女友嘅支持同陪伴。
截至1月14號中午，本周電影龍虎榜就有第1位《尋秦記》 、第2位《阿凡達3》 、第3位《優獸大都會2》。
