黎諾懿近年轉戰綜藝，由疫境廚神變節目監製，最近佢肩負監製、主持人及 「校長」三重身份拍綜藝節目《我的快樂年代》，與劉穎鏇、麥美恩、陳嘉琦、賴淞鳳、黃程晞及李偉燊攜手展開一場穿越時光嘅懷舊之旅。
黎諾懿與麥美恩及劉穎鏇等受訪時分享童年貪玩趣事，當中黎諾懿童年十分頑皮，鍾意四處跑，幾乎每日俾媽媽鞭打，好似手指伸進插蘇、玩捉迷藏由二樓跳落嚟等危險行為，黎諾懿笑指兩個兒子曳嘅程度不及自己十分之一。
麥美恩喺溫哥華長大，自封係「麻煩精」，大騷自己右手肘嘅疤痕，稱中學畢業前因無聊孭起個朋友，結果行冇幾步路就跌咗喺瀝青路面上受傷，手腕嚴重擦傷要入院縫針，當時護士喺病歷表上寫「fooling around（無聊貪玩）」。
於美國出生長大嘅劉穎鏇笑說以前覺得玩滑板好型，決定踴躍一試，喺滑下斜坡時失重心，連續翻滾幾圈，導致輕微腦震蕩，自此以後做事變得格外小心。
黎諾懿認為現時科技發達，雖然拉近人與人之間嘅距離，同時令彼此關係疏遠，佢希望透過節目帶領觀眾回到溫馨及親切嘅童年時光。呢次拍攝節目最大挑戰就係要尋找具有年代感嘅舊物件，包括錄音帶、錄影帶等，以及要搵合適拍攝場地，而黎諾懿更發現香港與馬來西亞兒時遊戲與成長方式上，存在唔少有趣差異，譬如跳繩、跳飛機跳法等原來大不同！
