鍾鎮濤前妻章小蕙早前接受魯豫訪問，罕有談及跟阿B婚姻失敗一事。Teresa提到自己當年24歲，唔理父親反對，帶着「戀愛腦」就同阿B結婚，當年兩人如童話般嘅婚禮，最終婚姻出現問題，Teresa更被傳媒影到搭上有婦之夫陳曜旻，後嚟佢跟阿B離婚收場。
34歲回復單身嘅Teresa將興趣變成事業，開拓時裝店事業，Teresa憶述當年大開眼戒，每日都好開心，有工作又可以照顧仔女，非常有成功感，不過每日工作好忙，只瞓四至五個鐘。
Teresa被問到離婚後有冇試過夜晚失落痛哭，佢細想片刻便指有一年聖誕節，當日放下工作，約好跟仔女度佳節，當日仔女冇出現，到處搵唔到佢哋，甚至連電話都打唔通，Teresa形容自己崩潰痛苦一晚便知道「那一天終於來了，是噩夢」。
Teresa指當時仔女仲細，被前夫剝奪探望子女嘅權利，佢話好心痛仔女因大人之間矛盾，被剝奪相處時間，亦自知係一名唔合格嘅媽咪。Teresa指離婚後，囝囝跟佢生活，囡囡鍾嘉晴跟爸爸，而嘉晴曾公開講「范媽媽更疼我」。
62歲Teresa坦言唔急住搵另一半，笑指喺靚衫中可以搵到安慰，因為佢覺得「人會佔用你嘅時間，有一個人安慰你嘅時候，你必須要付出，而約會唔係浪漫，係浪費」。
