龔慈恩喺台慶劇《新聞女王2》中方太一角，成為無數觀眾心目中嘅經典，但其實龔姐所演過嘅經典角色又點會只得方太吖。
日前龔姐喺社交平台分享佢喺内蒙古所拍嘅照片，當中戴上白色毛絨絨大帽、身披白色毛毛斗篷嘅佢，對鏡頭淡淡一笑，即令無數網民驚呼「女神好美」，龔姐喺帖文中留言：「那頂白色的大帽子，雪地的相遇！❄️還記得嗎？」仲加上hashtag雪山飛狐及追夢人。
龔姐呢張完美復刻佢主演嘅91年版《雪山飛狐》程靈素嘅相，勾起網民塵封咗35年嘅回憶，就連陳自瑤都留言：「都冇變過，直頭一模一樣😍😍😍」而陳曉華則留言「好靚呀😍😍😍😍」讚美龔姐嘅美貌。
