郭富城現身馬場，出席馬年系列活動發布會以及正式獲委任做馬年大使，熱愛書法嘅城城更將親自書寫嘅「馬」字墨寶送俾大會，寓意推動人馬合一精神。為隆重其事，城城更出動愛駒「舞林密碼」一齊拍廣告。為咗令佢愛駒可以乖乖地完成拍照，城城喺開工前特別餵咗佢食紅蘿蔔，而正式拍攝時「舞林密碼」嘅表現好乖好淡定，一啲都唔怕，令城城都讚佢好叻。
可以成為馬年大使都令城城深感榮幸，亦期待連串活動展開，可以推動人馬情同香港旅遊。城城亦預告已經錄好為活動炮製嘅新歌《繼續衝》，期待可以為大家傳播正能量！
城城嘅大女同二女對馬情有獨鐘，佢仲發現囡囡喺作文功課寫「爸爸應承送一隻馬俾我」，知道囡囡有呢個願望後。令佢都要認真做功課搵下適合嘅馬。雖然城城工作忙碌，但佢話三寶嘅百日宴一定會搞，不過就以低調家宴舉行。
