樂隊 Nowhere Boys 出道十年首次舉行簽唱會，一向親民嘅佢哋把握機會叫埋fans一齊上台玩遊戲，但係大家最期待嘅當然係聽佢哋唱Live。新專輯除咗係佢哋五個人嘅心血，原來主音Van都搵埋太太參與其中，因為今次以信件為專輯主題，構思封面時就想加上收件人名字，Van就邀請太太以西洋書法寫上款。當佢話要同太太去旅行作報答時，身旁隊友們又話要跟埋去，頓時被Van落閘拒絕。
為咗慶祝出道十周年，Nowhere Boys都有一連串計劃，嚟緊仲有佢哋嘅重頭戲嘅音樂會同大家見面，佢哋經已埋首準備，亦表明好期待演出，因為平日出騷都只係唱幾首歌，但係開騷就能夠唱足兩個鐘。
