2002年港姐季軍 胡家惠 07年離開演藝圈轉戰商界，之後與首任丈夫成婚並育有兩女，可惜最終離婚收場，雖然2020年再婚，不過到去年11月就宣布再次回復單身。估唔到佢單身不足兩個月，踏入2026年初就火速宣布有新戀情，佢更高調喺社交平台放閃。
近日佢上載咗一張依偎喺男士肩膊嘅照片，並寫上「珍惜你的人，你甚麼也不用做，他也會好好保護你」並Hashtag「謝謝你20年來的守護」、「從好朋友開始原來是這樣的」、「霸氣總裁的臂彎」。
字裡行間除咗感受到佢熱戀中嘅甜蜜外，亦似暗示佢同新歡係由多年朋友繼而發展成情侶。之後家惠接受傳媒訪問時，直認同男友已經相識20年，仲形容男友就好似自己嘅軍師，無論自己嗰陣拍拖、失戀甚至離婚，佢都會揾對方傾訴，直到呢次再次離婚，對方二話不說即刻飛嚟上海開解，仲Hero上身話要保護家惠，唔可以再比佢另外一個男人令佢喊，「霸道總裁」果然夠晒Man呀。
覓得第三春幸福嘅家惠，之後又接二連三上載咗多張喺上海影嘅相片，仲表示係「男友的視覺(角)」，相信呢啲咁靚嘅相片，都係由男友親自操刀為佢留倩影，而其中一張，家惠更公開咗佢同「霸氣總裁」嘅合照，兩人朗才女貎，感覺相當匹配。
原來家惠離婚後，就帶住兩個女兒移居上海，佢喺最新一個帖文就感恩表示，兩個女已經適應當地嘅生活，而家惠亦相信佢哋會越嚟越好。
