日前先勇奪電台男歌手金獎嘅 馮允謙 周末正展開佢首次個人戶外演唱會，而佢嘅全新專輯《FRAGMENTS OF MY MIND》今日亦正式面世。Jay話：「舊年開始籌備呢張專輯時，無諗住要咩主題，或者要求任何連貫性，好想隨意發揮，想寫乜就寫乜。結果發現每一首歌都有關於我嘅人生同埋成長，所以最後決定以《FRAGMENTS OF MY MIND》作為專輯名。」
今次專輯仲附送一支筆，歌迷可以參與專輯創作：「可以喺碟內嘅紙、相冊或者歌詞集上寫低想法，發揮想像力，或者寫啲想記低嘅事。」
Jay去年產量甚豐，中、英文歌幾乎全部都親自作曲，更參與部份歌曲填詞同MV創作。佢仲自信話：「早前返加拿大屋企搵到一個箱，裏面有好多畫冊，原來我細個對畫畫都幾有興趣，長大後興趣去咗音樂方面。當時我會畫啲天馬行空、好奇怪嘅嘢，雖然畫功唔係好叻，但好有想像力。依家拍MV我會想像成故事，好似《See Through Ya》MV，用stop motion（定格動畫）手法，用好多張相、好多圖畫、sketch（素描），可能因為我自小有呢啲興趣，先至會想放喺MV度。」
而Jay嘅歌迷畫功同創意亦一樣豐富：「朋友嚟到我屋企，會以為我係自戀狂，因為我放咗好多畫同有我個樣嘅擺設，其實都係歌迷畫畀我，佢哋真係好sweet，好多謝佢哋。」