賭王千金 何超蓮 同內地男星 竇驍 結婚近三年，舊年向華強太太陳嵐，因為拍片指一名富家女同男演員鬧離婚，而引起唔少網民揣測，超蓮同竇驍係咪感情生變，繼而傳出婚變風波。其後兩人發文否認謠傳，並強調夫妻感情穩定，去年12月超蓮亦有為老公竇驍慶生，力證情不變。
超蓮同竇驍已經有好一段時間無合體出席公開活動，日前兩人終於先婚變風波後首度同框，現身北京一個品牌活動。不過網上流傳一條視頻，片中見到竇驍先行出場，而著上紅裙高踭鞋嘅超蓮尾隨，兩人嘅舉動被指陌生同唔自然，又再惹嚟網友議論紛紛，直指兩人感覺被迫營業、貌合神離，甚至懷疑兩人係咪啱啱嗌完交？
不過，喺另一段影片就見到兩人鏡頭前後，有唔少甜蜜互動，竇驍除咗不時輕扶超蓮纖腰之外，更同朋友閒聊時作狀揸老婆條頸，夫妻感情甜蜜又自然。
而超蓮嘅家姐 何超雲 感情生活一樣都好甜蜜，繼之前同消防隊長甩拖後，最近又同新歡鬍鬚男Jony Su熱戀中，早前兩人除咗食大餐，甜蜜慶祝聖誕節之外，超蓮更喺社交平台限時動態，公開兩人去曼谷旅行慶祝男友生日嘅片段，片中所見超雲著上背心短裙餵鸚鵡，又親手整咗個handmade蛋糕Tag男友，齋睇相已感受到兩人真係好sweet呀。
