新晉6人女團 Honey Punch 日前以最年輕身份獲電台頒獎禮組合銅獎，7月底先出道嘅佢哋，僅花五個月時間就連獲兩大樂壇頒獎禮新人獎，兩個獎項令Honey Punch信心更加強大。由選拔到錄音排舞、每一次反覆練習，兼顧歌曲宣傳同學業壓力，全部係Casey、Jacey、Alma、Keira、Chelsa同Colour嘅日常。
Honey Punch出道後就憑跳唱歌曲《蝶式Butterfly》同《滑到入心Slide》，建立音樂風格，同時以強勁舞步及青春活力吸引粉絲關注，及後再已一首《Hug Hug》，令樂迷認識佢哋抒情一面。連奪兩獎亦令佢哋舞台實力同作品表現獲業界肯定，亦被視為正式開啟樂壇道路嘅重要里程碑。
能夠以新組合身份於短時間得到兩個樂壇頒獎禮認可，Honey Punch心情既激動又感動，仲話會繼續於舞台同音樂作品上努力，以更好表現回饋粉絲。
副隊長Jacey提到獲獎一刻非常興奮，更笑言唔會再激公司老闆同同事，展現輕鬆一面。Keira更於後台感動到熱淚盈眶：「喺台上得獎嘅時候緊張到唔識比反應，返到後台之後啲眼淚開始湧出嚟！」
六名成員由校園生活到舞台工作同步並行，仍然保持精神奕奕的狀態，佢哋曾試過孭住書包趕去排練，又試過於車上背歌詞、背舞步背到瞓着，亦曾懷疑「自己究竟得唔得」。接連獲獎當然係大鼓舞， 但是對Honey Punch而言，2025年嘅句號並非「完成」，反而更似「起點」，提醒佢哋要更努力回饋聽眾同粉絲。
